Vəhhabilik cərəyanı yaranandan bu günə kimi müxtəlif formalarda təqdim edilərək haqqında müxtəlif məlumatlar verilmişdir. Həmin şərh və məlumatları analiz edərkən Vəhhabiliyin mahiyyəti ortaya çıxır. Belə ki Vəhhabilik XVIII əsrdə Məhəmməd bin Əbdülvəhhabın ideyaları əsasında ortaya çıxmış dini-siyasi bir cərəyandır. Yarandığı ilk dövrlərdə həmin cərəyanın əleyhinə çıxanlar Məhəmməd bin Əbdülvəhhabın ideyalarını qəbul edənləri "Vəhhabi" deyə adlan­dırdıqları üçün onlar sonralar da bu adla tanınmışlar.
Son illər Azərbaycanda da özünə tərəfdar kütləsi tapa bilmiş bu cərəyan cəmiyyət tərəfindən heç də birmənalı qarşılanmır müxtəlif şəkillərdə qiymətləndirilir. Cəmiyyətimizin din xüsusilə də məzhəblər və cərəyanlar haqqındakı məlumat azlığını nə­zərə alaraq belə bir tədqiqat aparmağı lazım bildik. Vəhhabilik cərə­ya­nı­nı elmi nöqteyi-nəzərdən cəmiyyətimizə çatdırmaq da bu sahədəki elm adamlarının öhdəsinə düşür. Kitabda Vəhhabilik cərəyanı onun qurucusu meydana gəlmə səbəb­ləri kitabları inanc əsasları və təsir əhatəsi ilə əlaqədar məlumatlar bir yerə toplanmışdır.