İşbu Hızırname didikleri kitab ne vakdin yazıldığı Allahuâlem meçhul olup rivayettür kim müellifi Karası vilayetinde zuhur iden gâhi abdal gâhi aylakçı serkeşlikle ve dahi ayyaşlıkla namdar ilmi irfanı yarım ameli noksan baldırıçıplaktağlı bir kazakdır kim yazdıkları hacegan ulema vü fukahaca makbul görülmeyü içinde dürlü noksan ü bida keşfolunub şol sebepten ahaliye men ü nehy idülmüşdür. Lakin bu dürlü tedbir ve dahi tedipler fayda itmeyüp bu kazağun didikleri bir kısım molla vü sipahiyi yoldan azdurup Anadolu vü Urumeli'ndeki ışık taifesinin dergâhlarında kalenderi dervişanın ağuzlarında celali azgınlarınca dile gelüp cümle vilayetlere yayılmışdır. Güya şol zındık Hızırname didiği ol kitapta Hızır Aleyhisselam bilen söyleşüp andan alplığın devletin bereketin ve dahi sekinetin sırlarını ögrenür zulmetün fesadun bela vü musibetlerün riyasetün hikmetlerini işidir âlemde namdar olan mahlukat ü bir kısım eşyayı güya hikmet nazarında tefekkür ider kuvvet mevt beşer kimin hususları aklınca tahsil ider şeriat tarikat ü hakikat bahislerile şol bid'a tolu kagıldusuna nihayet virir. İmdi akl ü feraset sahibi hiçkimesne buncıleyün herze tolu kitaplaru okumağa yanaşmaz anlaru diline tolamaz hanesine sokmaz böyle yatlu bidatlu tomarları oda dutar yakar mollanın nökerin okadığını görse anlara değnek urur azgunlukları geçdükte nasihat virir okayan gendü evladı olsa Hakk'a düa vü niyazilen olmadı nasihat tekdir ü tecziye bilen tedip ider anı ıslah etmeğe uğraşur. Hem şol kitabı bir kazak yazmışdur anda kazaklıktan serkeşlikten abdallıktan ayruk nesne bulınmaz bulunmamakla bu cümle taifeden devlete devletlüye bazara bezirgâna çifte çubuğa rençbere dülgere velhasıl işinde gücünde rızkının peşinde hiç kimesneye fayda irişmez vesselam.